Anaanaq sorsugassalik

Anaanaq sorsugassalik

Iserfigisama silaannaa ataqqisassatut ippoq (tassa ataqqinartup tikka); torersoq saligaatsorlu angerlarsimaffippalaaranili. Iikkami asserpaaluit nivingapput kusanaqisut, nuimasut kalaallit assuutaannik atikkersorsimallutik assilisissimasut.

 

Siumut qiviarama takuara arnap qungujulalluni nikorfasup utaqqigaanga.

 

Ilisaraara assinimi iikkami nivingasuni takoqqammikkanni ilaavoq kusaqaqisunik atorluni.

 

Laura Táunajik tunumiut kalaallisuuinik kusanassutsimikkut naleqanngitsunik atorluni assilisissimavoq. Nuannaarpasinnera inuttaanut tulluarpoq, soorlumi arnaq taanna inuunermini artornartunik sorsugassanillu nalaattaqarsimanngitsoq.

 

Laura Táunaujik, partii Siumut tunuliaqutaralugu Inatsisartunut ilaasortaavoq, Tasiilamiillu maanga Nuummut tikippoq ukiaanerani Inatsisartut ataatsimiinnissaannut peqataajartorluni.

 

Laura arnaavoq eqeersimaartoq, isikkorinnissaminik pingaartitsisoq oqarluaannaraanni: arnaq takorannersoq. Allaffimminut ingerlasoq malippara. Torsuusakkoornitsinni inuit ikittut sanioqqutillattaapput aqqutitik kisiat ukkillugu. Ulapippaseqaat, Inatsisartuni ataatsimiinnertik naammasseqqammerlugu soraarlutik ilai aniallattaasut ilaallu suli allaffimminni suliaqartut.

 

Laurap allaffia torerluinnarpoq, sunalu tamarmi inissamini ippoq. Iikkamut qiviarama takuakka assit marluk Lauramut pingaaruteqarluinnartuusut: Paninngua Laila erneralu Leo.

 

Laurap panini Laila maanna paarinngilaa, Ivaaqqami Qaqortumiittumi innarluutillit angerlarsimaffianni najugaqarmat. Tamanna Laurap qamuuna annerisaraluaqaa ajunngitsortaali isiginiartarpaa, tassalu panimi tamakkiisumik ikiortariaqangaartup ikiorneqarnera, qujamasuutigeqigamiuk.

 

 

Scene 2

  1. august 2001 nalunaaqutaq ullukkut ataasinngoqqissaartoq Laila Tasiilap napparsimaviani inunngorpoq. Ulloq Lauramut puigunaaqaaq ernisarfimmiimmatami peqqissaasut sisamat ernisussiortorlu ataaseq ulapputeqimmata. Laura ernigami naallioqaaq, meerartaanngua saavanut ilineqanngilaq, oqaluttuunneqanngilarlu sorlermik meerartaarnersoq. Eqqaamavaa ernisarfik tarrajuttoq napparsimavimmillu sulisut ulapputeqisut, Laura paatsiveerusimaarpoq suullu misigissutsikkut tamarmik illagussimasutut misinnartut eqqaamavai.

 

Meerannguaq qiviagaa nukeqanngilaq uumassuseqarpasiganilu. Qarsungaqaaq soorluli qalipaateqanngitsoq. Laurap oqarneratut arnarpassuit allat meerartaaraangamik misigisartagaat pilluarneq, Laurap ulloq taanna misiginngilluinnarlugu eqaamavaa. Arnaq utoqqaq norskeq ernisarfimmut iserpoq assut ulapilluni. Isikkumigut ajukkunnanngeqaaq, sunaaffamiuna nakorsaq misilittagalik taassumalu meerannguaq passunnerani uummartippaa.

 

Pisup uippakajaarnaqisup qaangiuttutut ilimmat unnuttoq Laurap panini kissumiarlugu qimerluaalaalerpaa, puigunngisaannagassamili malugisaqarpoq piffissami sivittajaami anniaatigeqisaminik. Paninnguami isai qanoq isikoqarnersut takuniarlugit qulleeraq ikimmagu Lailap qisuariaatiginngilaa, inngiasunngilaq isaatalu qernertortai nikigatik. Lauralli neriuummingaarnerup pianik eqqarsarpoq mikinermini taamaattoq, isigisaalu ulluni aggersuni aaqqinnissaannik neriuuteqarluni, kisiannili misigissutsimigut annilaangavoq.

 

Laurap aaliangiussimavaa nakorsanut ilaquttaminulluunniit oqarniarani namminermi aaqqittussatut neriuutigigaluaramiuk. Kisiannili ullut ingerlanerini paasinarsivoq Laila inunnguutsiminik innarluuteqartoq imaannaanngitsunik tappiitsuullunilu noqarnermik nappaateqartoq qallunaatut hypoglykæmiske anfald-imik taaguutilimmik.

 

Piffisami tassanngaanniit anaanaasup eqqarsaatimigut misigissutsimigullu ilungersunartut atulerpai. Imminut pisuuteqqajaanerit niaquani kaavittuartarput. Sooruna meeqqamik innarluutilimmik tunineqartunga? Sugama? Sooq uanga?

 

Laurap tamakku eqqarsaatit imaannaanngeqisut toqqorterlugit pigerujoorpai. Laurap eqqaasaammini annerinerpaasaralugu eqqaamavaa meeqqat allat anaanaminnik ilisarsillutik arpallutik pakkutaarinninnerat isigissallugit, namminermi inuutilluni paniminit takuneqanngisannartussaavoq. Tamanna Laurap misigissutsimigut kamannguullugu pigilerpaa, allaammi ima kamatsigilersimavoq upperisani Guuti kamaallugu. Laura Guutimit pillagaasutut misigisimavoq, namminerli kamamminik isumaqartaraluarpoq nammineq taamaaliorneqartariaqanngikkaluarluni, sapinngisannguanimi inuunini peqqinnartumik atorpaa. Laura ilaatigut eqqarsartarsimavoq sooq arnaq imerajuttoq imminut paarinngitsoq meeqqamik taamaattumik tunineqarsimanngitsoq namminiunngitsumik? Kisianni misigissutsit tamakku Lauramut qaangiunnikuupput pilluaammernermillu taarserneqarlutik. Laura siunnersorneqarami tarnip pissusaanik ilisimasalimmik oqaluussaqarsinnaalluni annikigigaluaqalugu akuersivoq, nalunngilaami apersussagaani qanoq misigisimanerminik oqaasinnguitinniarlugu. Taamaaliorporli, kisianni naammaginngitsutut ikkamiuk palasimik oqaluussinissaminut neqeroorfigitikkami ingerlaannaq Laura akuersisimavoq, aaliangersimavormi palasi Guutip kiffaa saassutariniarlugu.

 

 

Palasillu oqaasiata Laurap kamannera pilluarnermut sangutippaa, Laurap paasivaa paninnguani imminut tunniunneqarsimasoq Guutip nalunnginnamiuk Laurap asattuullugu paarisinnaagaa.

 

Laurallu ulloq manna tikillugu apeqqusinngisaannakkaminik inuulernikuuvoq innarluutilimmik paneqarnerminik. Lailammi anaanani asaqaa pilluaatigeqaa soorluttaaq aamma Laurap paninnguani asaqigaa.

 

Laura Taunajik paninilu Laia. Asseq. Namm. Pigisaq.

 

Scene 3

 

Laura issiaqatigitillugu misigissutsit imaannaanngeqisut atorai takusinnaavara allaallumi malugivara, isikkua takorluuerpasippoq ukiumut 2009-mut qaammat juli utertuusivoq, isikkumigut ersarippoq taamani misigissutsit atukkani massakkoqqissaat utersaarfigaallusooq… qissaserpoq sunnertsinnaqisumik.

 

 

2009-mi qaammat juli Laurap eqqaamavaa Nuussuarmiitilluni Kommuneqarfik Sermersuumiit allagarsilluni paasitinneqarlunilu paniminit arsaagaalluni.

 

Laura arnaq pinnersoq, isaanit annernaqisumik qulliit uluaasigut kuupput. Isersimaffipput saajoqarmat tarrajuppoq aamma Laurap allaffimmi qulleq ikumatinngilaa, soorluli oqaluttuariniakkani aamma inip isikkuasigut ilanngullugu oqaluttuarigaa.

 

qulliini kuuttut allarteriarlugit pissatsissimarpasilluni ingilluartiteriarluni nangippoq, taamanili tassa aaliangiuppaa nammineq sorsuttariaqarnini.

 

Ataasinnguamilluuniit uppernarsaatissaqaratik sullissisut (sagsbehandlerit) Laura avaqqutaaralugu sulisimapput. Anaanatullu ulorianartorsiortitsinnaasutut naqissusserneqarluni arsaagaavoq.

 

Allaammi Qaqortumiit panini aallarukkuniuk politiinut tunniunneqarnissaminik siorasaarneqarsimavoq. Tamanna Lauramut sinnattupilunnertut misigisimanarsimavoq, sinnattupilummiit itersinnaanani ilungersorneq, nunarsuarmilu kisimittutut misigisimaneq.

 

Laura Taunajik

 

Scene 4

 

Tunumut angerlarluni Laurap sorsuutissani piareersariartorpai, anguniarniarpaami paninnguani asaqisani nammineq paareqqilerniarlugu, isumaqatigiinnikuuppummi Laurap panini tigoqqikkusuleruniuk tigoqqissagaa nammineq aaliangikkaminik Ivaaqqamut paaritikkallarnikuugamiuk. Kisianniliuna allarluinnarmik pisoqartoq Laurap paasilerpaa.

 

Laura anaanaq kisimiittuugami pilersuiniarnermigut ilungersorpoq, aaliangiuppaalu Tasiilami ilinniartitsisutut sulilluni aningaasaqarnini aaqqinniarsariniarlugu. Paniminut nukissaqarluarumalluni. Tuunumiitillunili kalerrinneqarpoq Lailap angerlarsimaffianiit piaarnerpaamik Nuummut paninni orneqqullugu Saanamut aallarunneqarmat.

 

Laurallu paasivaa panini ullut arlallit napparsimarujussuarsimasoq namminerli kalerrinneqarani, aatsallu ajornerpaaffianiilermat kalerrineqarpoq. Laura misigisimavoq oqartussaaqataanngitsutut ajattorneqartutullu, naak angajoqqaatut akisussaasutuaagaluarluni.

 

Laura nipangerpoq ilungersorpasilluni misigissutsini kamani aqunniarpasikkaluarlugu isaanit timaanilu takusinnaavara uummammigut annernartumik eqqaasaqartoq.

 

Laurap panini piaarnerpaamik timmisartoq siulleq ilaaffigalugu Nuummut ornippaa.

 

Laurap iserfigaa paninguani asangaakkani siniffimmi nalaannalersimasoq oqassaarluni nipaarussimasoq. Inuttanngua peqqippasinngeqisoq anaanaata takugamiuk puigorsinnaanngilaa.

 

Anaanatulli eqqissisimaniarsaraluni sallaatsunnguamik panini orneriarlugu isussuffigivaa: »Asasara anaana tikippoq…..«

 

Anaananilu tamarmik qissarserput Laila nukeqanngivilluni soorlulusooq nukini kingulliit tamaasa atorlugit sajulluni massinniarsaraluni anaanani pakkuppaa iparaqqittussaanngitsutut ilillugu.

 

Apersuisutut nukittuniaraluaqalunga misigissutsikkut attortinnermik Laura qissaseqatigivara, takorloorlugu meerannguaq annikilliungaaqisoq annakkuummertoq.

 

Laurap sakkortuumik uppernarsiseqqippaa panimmi anaanani qanoq pisariaqartitsigineraa, Lailami anaanani ilaginngippallaaleraangamiuk napparsimalertarpoq noqaqattaalerluni, naak ulluinnarni pisarialinnik ikiorneqartaraluarluni anaanani eqqaminiinnissaa pingaartuusoq marluullutik misigisarlugu oqarpoq.

 

Taamani Laurap misigisani imaannaanngeqisut misigigamigit aaliangerpoq nammineq sorsunniarluni, innarluutilimmik meeralinnut atugassarititaasut aaqqiiffigerusullugit pisut sakkortoqimmata, allamut misigillaqqunagit. Sorsunnera annertungaarmat ullumikkut Inatsisartunut ilaasortaalernikuuvoq. Namminermi misigisimasani annernartut annikilliornartut unamminaqisullu allamut misigitikkusunnagit. Ullumikkulli Laurap nammineq aaliangigarivaa panini Laila Ivaaqqamiiginnarnissaa, inuusuttunnguleriarmat pisariaqartitai annerpaartaat ikiorserneqarfissaalu Ivaaqqamit tunniunneqarsinnaammata, Laurallu panini tikisillugulu tikeraartarpaa ulluni nalliuttuni.

 

Laura Taunajik erninilu Leo. Asseq Namm. Pigisaq.

 

Lauralli misigisimasai aamma ilungersunartuinnaanngillat, 2010-mi februarip 15-iani peqqissumik ernertaarpoq. Taamani eqqaamalluinnarpaa peqqissumik kissaateqarluni meerartaarluni qanoq pilluaammernartiginera. Ernera Leo ilaqutariinnut ilaalernikuuvoq aleqaminut tappiitsumut asanneqisoq. Suli Laurap allaffianiitilluta oqaatsinik eqqarsaammerartunik tunivaanga ima nipilimmik: »Assak ataatsimik inuaqaruni kivitsisinnaangilaq, inussat tamarmik atorfissaqartippagut« Nassuiaallunilu Inatsisartuni sulinermini kisimiilluni allannguisinnaanani, kivitseqatissaminillu ilalersoruni aatsaat suliassaq taamak annertutigisoq kivissinnaallugu oqarpoq.

 

Laurap nakimmaallilluni qiviariarlunga oqaatsini naggaserpaa: »Pisut pisarput siunertaqarlutik.«