»ANINGAASAKILLIORNEQ SUNGIUNNEQARSINNAAVOQ«

»ANINGAASAKILLIORNEQ SUNGIUNNEQARSINNAAVOQ«

Nunatsinni ilinniartut qaammammut aningaasat atugassatik nungujaartarpaat, ilaalli sipaallaqqissuupput.

Sipaallaqqissoorusukkaanni qanoq iliortoqarsinnaava?  Saniatigut suliffeqartariaqarpa?  Allaaserisami ilinniartumik sipaallaqqissumik oqaloqateqarnitsinnit paasisaqarit.

 

Qaammamut inuussutissat

 

Nuka Larsen 25-inik ukiulik ilimmarfimmi ukiup aappassaa Inuiaat piorsarsimassusaat oqaluttuarisaanerannilu bachelorinngorniarluni atuarpoq. Aappanilu kollegiemi anginngitsumi najugaqarput, iggavik ineeqqamut ammaannarluni. Qaammammut 4600 koruuninik ilinniagaqarnermusiaqarpoq, akiligassanilu akilereerlugit 3.650 koruunit qaammammut sinneruttarput. Aningaasat ullormut atortagai agguaqatigiisissagaanni 150-miit 200 koruunit tungaanut atortarpai. Ilinniartuulunili suliffeqarniaraanni nalunanngitsumik ilinniakkap salliutinnissaa pingaaruteqarpoq.

 

– Saniatigut suliffeqarpunga nuannarilluinnakkannik, piffissaqaraangamalu sulisarlunga. Sulissagaangama ilinniagassakka apeqqutaatittarpakka. Ilinniagaqarnermusiama saniatigut aningaasaateqalaarniarlunga sulisarpunga, atisanut assingusunullu akissaqarusullunga, Nuka Larsen oqarpoq.

 

 

Ullaakkut issingiassartortarit

 

Nuka Larsen-ip oqaatigaa sipaarusukkaanni nerisassanik pisisarneq allanngortinneqarsinnaasoq. Akikillisat peqqinnartullu sipaarnarnerusarput.

 

– Peqqinnissaq anguniarlugu ullaakkut issingiassartortarpunga immulerlugit, ullup qeqqanullu iffiartortarlunga mannilerlugit. Aningaasaatikka eqqarsaatigalugit peqqinnissarlu anguniarlugu, pujortassaarlungalu imissaarnikuuvunga. Tamanna aamma atuarninnut pitsaasumik sunniuteqarnikuuvoq, Nuka Larsen oqarpoq.

 

Erseqqissaassutigaa aningaasakilliorneq sungiunneqarsinnaasoq, naammassigaannimi aningaasakilliorunnaarneq anguneqarsinnaammat, Kalaallit Nunaannimi ilinniarsimasut atorfissaqartinneqarmata.