Ida Heinrich 2018-imi Arnatsialak

Ida Heinrich 2018-imi Arnatsialak

Nunatsinni erinagissorsuarmik annaasaqarpugut, februaarilli 15-ani Ida Heinrich alianaqisumik toqutinnagu ARNANUT erinarsortartoq kræftertoq 2018-imi Arnatsialattut toqqarpaa.

Taama Sermitsiaq.ag-p saqqummersittagaa ARNANUT tusagassiutinut nalunaaruteqarnermi taama allappoq.

Ida Heinrichip toqqagaanera imaattunik tunngavilersorneqarpoq:

Nipilersorneq kulturini suniluunniit paasineqarsinnaavoq. Nipilersorneq kisimi misigissutsivut pillugit oqariartorniarnitsinni nunarsuarmi tamarmi paasineqarsinnaavoq paaseqatigiissillutalu. Nipilersorneq asanninnermik oqariartorneruvoq, tamannalu oqaatiginiarlugu ilungersortoq akunnitsinniikkunnaarpoq.

Nersornaatip Ida Heinrichimut tunniunnissaa Arnanut januaarimi angumeraa, killitsissutigeqalugulu tulluussimaarutigaa.

Ida Heinrichip nuannarinnitsiminut oqariartuutaa kingulleq Sisimiuni tusarnaartitsinermini Isiginnaartitsisarfimmiit oqaatigisaa:

Asanninnerup nukittunerulersittarpaatigut. Asanninneq nakorsaatit pitsaanersaraat. Tamassi qamannga pisumik asavassi.

Ukiut nikinneri tamaasa Arnatsialammik toqqaasoqartarpoq, arnarlu inoqatiminut immikkut ittumik iliuuseqarsimasoq toqqarneqartarluni. Arnatsialammik toqqagassatut 25-nit innersuunneqarluni Facebookimilu isummaminnik saqqummiisorpassuarnit Ida Heinrichip aqqa takkuttuartoq Arnanumit oqaatigineqarpoq.

Taamak amerlatigisut arnamik ataatsimik toqqaanerat siusinnerusukkut takusimanngilarput. Tamatuma takutippaa Idap asanninnermik oqariartorluni erinarsornerata tamatta killissimagaatigut, Arnanumip aaqqissuisua Arnatsialammik toqqaasartut ilaat Martine Lind Krebs oqarpoq.