Kalaallit Nunaat Canadami nunaarineqartoq

Kalaallit Nunaat Canadami nunaarineqartoq

Kalaallit aallarnisaasut arfineq-pingasut  qaammaterpassuarni piareersarsimapput ’Indigeneous Fashion Week Toronto’-mi siullermi maajip 31-ianiit juunip pingajuata tungaanut pisumut peqataaniarlutik, taakkulu pissanganartunik makkuninnga sanaartorlutillu ilusilersuisuupput: illup iluani atortussanik ilusilersuineq, annoraamerngit, pinnersaatit, eqqumiitsuliat, atisat allarpassuillu kalaallinut tunngasunik ilisarnaatitallit.

 

Kalaallit sanaartugaat assorsuaq soqutigineqarput aallarnisaasullu tamarmik nioqqutissaminnik tunisisimapput taamalu imminnut taaasinnaalerlutik Canadamut nioqqutilittut.

Kiisalu pisiniarfiit, saqqummersitsiviit, ilusilersukkanik pisiniarfiit Torontomi aamma Canada tamakkerlugu pisiniarfiit uiguleriiaat pissanganartumik oqaloqatigineqarput, taakkulu kalaallit sanaartugaannut immikkuullarissunut qaffasissumillu pitsaassulinnut annertuumik soqutiginninnermik takutitsipput.

 

Erseqqilluinnarpoq Canadamiut sanaartukkat immikkuullarissut pisiarerusukkaat, siunissamilu suliffeqarfinnut kalallinit pigineqartunut allanut amerlasuunut Canada qularnanngilluinnartumik tunitsiviusinnaavoq pissangarnartoq.

 

Aallartitaasut peqataalersinnatik neriuutigisimavaat aallarnisaasut imminnut nittarsaatissallutik namminnerlu sanaartukkatik takutissallugit, nioqqutissanik tunisissallutik niueqatigiinnissamillu isumaqatigiissuteqassallutik.

Taamaattumik nunanut allanut tunisinissamut aallartitat pisumut peqataanertik iluatsilluartoq naammagisimaarlugu eqqaasinnaalerpaat, tassami ilimagisat tamarmik iluatsimmata allaallu qaangerneqarlutik, taama SIUA INUvation, kalaallit aallarnisaasut ikorfarfiannit piareersaallutik aaqqissuisut tusagassiutinut nalunaaruteqarput.

 

Kalaallit namminersortut Canadami peqataasut kiisalu aaqqissuisut. Talerpimmiit: Salik Hard, SIUA INUvation/Kisserup Arctic, Nike Berthelsen, Nuuk Couture, Judith Dardon, Kisserup, International Trade Roots, Pernille Fischer Boulter, Kisserup International Trade Roots, Idrissia Thestrup, Visit Greenland, Louise Lynge Berthelsen, Nuuk Couture, Hanne Bruun, Hanne Bruun Design, Elna Jensen, Savaatillit Arnartaai Ingerlatsitseqatigiiffik/Fåreholderkvinders kooperativ, Peter Jensen, Inuk Design, Liss Stender, Inuk Design, Simon Lynge, Singer-Songwriter, Elisa Motzfeldt, Sava Design, Olga Ljungdahl, Mersortarfik Panigiit, Hildebjørg Egilsdottir, Nuna Glacier, Malik Ljungdahl, Mersortarfik PanigiitAsseq namm. pigisaq.

 

 

 

Aallarnisaasut taakku arfineq pingasut tassaapput:

 

  • Elna Jensen, Sillisit, Kujataani savaatillit arnartaasa akornini suleqatigiiffik pilersinneqalersoq sinnerlugu, tassani atisanik meqqulualinnillu manngertunik nioqquteqarnissaq siunertarineqarpoq
  • Elisa Motzfeldt, Kangerlua, Sava Design, taassuma suliarai atisat assigiinngitsut, pinnersaatit aamma saniatigut atortut
  • Olga aamma Malik Ljungdahl, Sisimiut, Mersotarfik Panigiit, ukiorpassuarni meeqqanut inersimasunullu puisit amiinik atisaliortartut
  • Louise Berthelsen, Nuuk, Nuuk Couture, atisanik kittanik/avittanik aallalersukkanik ilusileruisartoq
  • Liss Stender, Nuuk, Inuk Design, ilusilersukkamini assigiinngitsorpassuarni erseqqissumik kalaallisut ilisarnaatitalinnik pilersitsisartoq
  • Hildebjørg Egilsdottir, Nuuk, Nuna Glacier, ukiorpaalussuarni naneruuserfinnik ammalortunik ulunik allalinnik ilisimaneqarlualersunik ilusilersuillunilu sanaartortoq
  • Maria Panínguak’ Kjærulff, Nuuk, Mariagreenland, Nunatsinnik eqqumiitsuliortuuvoq ilisimaneqarluartoq, massakkullu eqqumiitsuliaminik naqitsisarnikkut ilismaneqarnerulersitsisoq
  • Hanne Bruun, Nuuk, Hanne Bruun Design, tassaavoq suliffimmikpilersitsisoq nutaaq, pinnersaatinik sølviusunik kalaallit kulturiannit ilisarnaatilinnik sanaartortoq

 

Aallarnisaasut tamarmik nunanut allanut nioqquteqarnissamik piareersaalluni ingerlatsinermut peqataapput, taanna kalaallit aallarnisaasut ikorfarfiannit – SIUA INUvation-imit ingerlanneqarpoq. SIUA ikorfarfik tassaavoq aaqqissuussineq Inuussutissarsiornermut Nukissiuuteqarnermullu Naalakkersuisoqarfimmik sullissinissamut isumaqatigiissuteqarnikkut aningaasalersorneqartoq periarfissamillu aqqutissiuussisoq.

Greenland Business, pisumi aamma peqataasoq, aallarnisaasut nunanut allanut nioqquteqarnissamut qinnuteqarneq tunngavigalugu tapiiissuteqarnissamut akuersisimavoq Namminersorlutik Oqartussat nunanut allanut nioqquteqarnissamut inuussutissarsiornikkut siuarsaatissatut immikoortitaat atorlugit.

Kiisalu Visit Greenlandip aallarnisaasut tamarmik immikkut suliamik saqqummiunnissaannut atugassaannik sanaassimavai, ullullu ingerlanerini peqataasimalluni kalaallillu ilusilersugaasa, eqqumiitsuliaasa aamma assassugaasa ersarissuunissaat tunineqarnissaasalu annertusarnissaat isumagalugu.