KAROLAP INGERLAVIA TAKISOOQ NAASSAANNGITSUTUT ITTOQ

KAROLAP INGERLAVIA TAKISOOQ NAASSAANNGITSUTUT ITTOQ

Karola Arqe Ittoqqortoormiormiu kræftimik nappaateqarnerata kingorna Nuummut katsorsartikkiartortalerpoq, nunarput qimaqqaarlugu Ittoqqortoormiiniit Nuummut apuunniartarpoq, naak ilaanni paarineqarani angalasariaqartaraluarluni.

 

All. MLPK

 

Nunaqarfik nunatta avannaarsuani tunumi ippoq avinngarusimangaatsiartumi. Ittoqqortoormiit Uummannap avannarpasitsigisaatut inissisimasoq issileruttortoq Karola Arqe naamigut anniartarluni nakorsiartaraluarluni angerlartiinnarneqartarpoq. Sivisuumilli taamatut nakorsiartuareerluni paasineqarpoq puammigut kræfteqalersimasoq. Karolap timmisartorujussuartarneri tassanngaanniit aallartipput.

 

Nunarput qimaqqaarlugu apuuttarpoq

 

Nunatsinni angallannerup aaqqissuussaanera ilaanni kipiluttunartorujussuusarpoq, tamannalu Karola Arqep ilisimaarilluarpaa. Siornami januaarimili kræfteqarluni paasitinneqarami Danmarkimi pilatsereernermi kingorna Nuummut kemortikkiartortalerpoq. Tamatigut aqqut takisooq ingerlavigisariaqartarpaa, naak kemortinnermi nalaani nukeerulluinnartutut misigisaraluarluni.
Ittoqqortoormiiniit Nerlerit Inaanniit Islandimut unnuiartoqqaartariaqartarpoq, ullualuillu qaangiukkaangata aatsaat Islandimiit Nuummukartumut ilaasarluni.

– Kemortittarnerma nalaani sanngiillilluinnarpunga. Ittoqqortoormiiniit Islandiliartillunga paarsisoqanngilanga, nukeqanngivippungali. Iluatsitsinerinnakkut ningaara ingiaqatigaara, qimappaangali. Ingerlalaarlungali qasorujussuartarpunga.

 

Tuluttoorsinnaanngilaq

Islandimut tikikkami ningaami qimareernerata kingorna oqaloqatiginnissinnaanera killeqarpoq. Islandermiut amerlasuut danskisut oqalunneq ajorput, amerlanerillu islandimiusut oqalussinnanngitsunut tuluttuinnaq oqalussinnaasarput. Tamannali Karolamut ajornarpoq, danskisut oqalussinnaanera killeqarpoq, kiisalu islandermiusoorsinnaananilu tuluttoorsinnaanngilaq.

 

– Taamani qujanartumik arnap kalaallip pikkorissariarsimasup eqisimaarlunga ingerlaqatigaanga, ilami paarsisoqanngilangaluunniit. Isikkama aappaa nukeqanngilaq, ikiortissannillu pisariaqartitsillunga saaffiginnittaraluarlunga ingiaqateqartinneqarneq ajorpunga, Karola Arqe oqaluttuarpoq. Pissutsillu kræfteqartumut Karolamut kipiluttunarsinerusarput timmisartoq nunatsinnukartussaq kinguaattooraangat, ilaannimi Islandimi ullorpassuit unnuisariaqartarpoq.

 

 

Karola Arqe Islandimiilluni assinga.

 

Ukiumut arlaleriarluni aallartarpoq

 

Karolamut nappaassuarmik eqqugaasumut artorsaatit annertoreersut qaavatigut angalarujussuartariaqartarneq aamma imaannaanngeqaaq.

 

– Islandikkoortariaqartarneq ajornakusoorpallaaqaaq, taamatut nappaateqarluni paarsisoqartinneqassananilu sivisuumik unnueqqaartariaqarneq nuannerneq ajorpoq, Karola Arqe oqaluttuarpoq.

Ittoqqortoormiini kiguserisut nipaallisaataannarnik tunisittartut Karola Arqep pillugit ilanngullugu eqqaavaa, Ittoqqortoormiinimi kigutileriffeqanngimmat.

 

– Qujanartumik Nuummi Dronning Ingridip napparsimmavissuani ikiorluarneqarpunga, taanna qujaniarnarpoq.

 

 

Paasissutissat

Karola Arqe 1960-imi inunngorpoq, siusinaartumillu suliunnaarnersiuteqalernikuuvoq taamaattumillu angerlarsimaannartunngornikuulluni. Ulluinnarni avittartarpoq, qilattaasarpoq, nissiaasarpoq sapangaaqqerinerlu nuannarisaralugu. Marlunnik paneqarpoq, arfineq-pingasunillu ernutaqarluni.