MEEQQAT PERORSARLUARAKKU TATIGISSAVAT

MEEQQAT PERORSARLUARAKKU TATIGISSAVAT

Hanne Saandvig Immanuelsen niviarsiaqqanut pingasunut anaanaavoq, angajullerlu ukioq kingulleq AFS aqqutigalugu USA-mi ukiivoq. Anaanaasumut iperaanissaq artornarnerpaasimavoq, meeqqanili tatigisariaqarsimavaa. Qanoq iliorpa sunalu iluaqutaava? Allaaserisami misigisai pillugit, siunnersuutinillu atuarlutillu pissarsisinnaavutit, inuusuttuaqqamik ungasissumi ilinniartumik meeraqaraanni qanoq iliortoqarsinnaaneranik.

 

 

Hanne Saandvig Immanuelsen-ip pania Najannguaq Saandvig Qvist, 16-inik ukioqarluni Nuummi toqqissisimaffini qimappai, USA-mi ilaqutariinni naapinnikuunngisaannakkamini najugaqarniarluni. Pilersaarutaavoq Ohio-mi illoqarfiit annersaat ilaanni Cincinatti-mi, 3 millioninik inulimmi ukiinissaq. Hanne-mut anaanaasumut paneqarluni Nuummit 16.000-inik inulimmit aallalersumik imaannaasimanngilaq.

 

– Mittarfimmi qianitsinni eqqarsaraluarpunga aallajaarpallaartoq. Kisianni meeraq perorsarluarsimagaanni tatigineqartariaqarpoq, tatigalugulu nuannersorpassuarnik misigisaqartussaammat, Hanne S. Immanuelsen siorna panimi aallalernera eqqaallugu oqarpoq.

 

 

Piareeqqagit
Hanne S. Immanuelsen oqaluttuaraattaaq inuussuttuaraateqaraanni ilinniariartussalluni aallartussamik, eqqarsaatigisassat amerlasut.

 

– Pingaartorujussuuvoq inuusuttuaqqap aallannginnerani aningaasanik katersinissaq, Hanne panini 2014-imi Augustimiit 2015-imi Julip tungaanut AFS-ernissaanut 76.000 koruuninik akiliisimasoq oqarpoq. Ukiineranut kapitinnerit, sillimmasiinerit, atuarneq, angalanermut billetsit assigisaallu ilaapput.

 

– Angajoqqaatut tarnikkut piareersimanissaq pisariaqarpoq. Inuusuttuaraq ungasissumut aallartinniaraanni iperaasinnaasariaqarpoq, tatigalugulu toqqissisimanartumiissasoq. Inuusuttuaqqap oqaloqateqarnissani pisariaqartippagu oqaloqatinissaa pingaarpoq, oqaluttuarpoq.
Hanne S. Immanuelsen isumaqarpoq AFS kattuffiusoq aqutsilluartoq, taamaattumillu inuusuttunut atuarfissatut piukkuppaa.

 

Najannguaq Saandvig Qvist AFS-erami angajoqqaaarsianilu assigat. Asseq Namm. Pigisaq

Misigisat ilimaginngisat
AFS-eraanni nunagisaq ilaquttallu ornillugit juullisioriartoqarneq ajorpoq. Nunami allami ukiineq siunertaraa, ilaqutariilli Saandvig Immanuelsen-ikkut ilimaginngisaminnik misigisaqarput.

 

– December qaammataagaa anaanaga Danmark-imi toquvoq (Danmark-imi najugalik, aaqq.) Najannguarlu aliasuttorujussuuvoq. Ilisaaneranut ilaarusuppoq naluarali tamanna ajornannginnersoq. Akisoorujussuussaaq, qujanartumilli paasivarput AFS-ip angalanermut sillimmasiisuisa ilaquttamik toqusooraanni angalaneq akilersinnaagaat, taamaattumillu Naja Danmark-iliarpoq. Taamaammat piareersimaffigineqartariaqarpoq ilimaginngisanik pisoqarsinnaanera, iluatsitseqaagullu sillimmaserneqarsimammat. Qujanaqaaq tapersersuilluartunik angajoqqaarsiaqarmat, Hanne S. Imannuelsen oqarpoq. Maanna pania Najannguaq S. Qvist ukioq siulleq ilinniarnertuunngorniarfimmi atuarpoq, sulilu naluaa nipilersornerup tungaatigut allamulluunniit ilinniaqqinniarnerluni, anaanaasoq Hanne S. Immanuelsen oqaluttuarpoq.

 

 

SIUNNERSUUTITSIALAAT:
· Inuusuttuaraq oqalotaqigilluartaruk.
· Aningaasatigut tapersersoruk. Inuusuttuaqqap nunamut allamut atuariartortinnera akikinngilaq. Aningaasaateqarfinnulli assersuutigalugu Nuna Fonden-imut imaluunniit Sisimiuni oqaasileriffimmut qinnuteqartoqarsinnaavoq.
· Periarfissat misissorluakkit.
· Tapersersuinissannut piareersimagit, killeqartariaqarporli meeqqavit namminiilissappat iperarnissaa ilikkartariaqarmat                                                         · Meeqqat tatigiuk iperaallutillu.
 

PAASISSUTISSAT:
· AFS naalisagaavoq: American Field Service
· Kattuffik sorsunnersuup siulia aappaatalu kingorna pilersinneqarpoq, arlallit isumaqarmata piorsarsimassutsikkut piginnaasat annikippallaarneri peqqutaallutik, persuttaanernik sorsunnernillu kinguneqartartut.
· Paarlaasseqatigiilluni ukiinermi peqataasut, piorsarsimassutsit allat qanimut ilinniarnerini, inunnillu allanik attaveqarnikkut, piorsarsimassutsikkut piginnaasat annertusarneqartarput.