NUNARPUT KIGUTIT NAKORSAANNIK ATORFISSAQARTITSIVOQ

NUNARPUT KIGUTIT NAKORSAANNIK ATORFISSAQARTITSIVOQ

Jason Nystrup 28-inik ukiulik, Århus Universitetimit 2013-imi kigutit nakorsaattut naammassivoq. Taamanili Nuummi kigutileriffimmi sulilerpoq, nakorsiartorpassuillu ulapputigisaqai. Kigutit nakorsaannik amerlanernik amigaateqarpugut, oqarpoq. Kigutit nakorsaannik inuusuttumik apersuinerput, uani atuaruk. 

 

 

Kigutinut nakorsaalluni qanoq ippa?

 

– Nakorsiat assigiinngitsuusarmata suliassat allanngorartaqaat, taamaattumik ulapikkaluaqaluta suliffiga nuannaraara.

 

Kina kigutinut nakorsanngorsinnaava?

 

– Piumasaqaataavoq qaffasissumik kisitsinermut pikkorinnissaq, kiisalu ilinniarnertuunngorniarfimmi tuluttut, fysikkimilu qaffasissuseq B-mi atuartinneqarsimanissaq. Kigutinut nakorsanngorniarfimmi biologiimi, fysikkimilu ilinniartinneqarnerusarput, kisianni kisitsinermut tuluttullu pikkorinnissaq pingaaruteqarpoq, atuakkat tamaasa tuluttut allassimammata. Atuartuulluarnissaq pingaaruteqarpoq, sakkortullunilu imminut piumaffiginaqimmat. Atuarsimasassat arlaqarput, misilitsinnermilu atuakkanik assigisaanillu ikiuisinnaasunik nassataqaqqusaanatik. Atuarnerup ingerlanerani nakorsianik sullissinermik ilinniartinneqartarput.

 

Inuusuttut allat kigutinut nakorsanngorusuppata, qanoq kaammattorsinnaavigit?

 

– Amigaatigineqaqaat, naammassigunillu ingerlaannaq nunatsinni suliffissaqassapput. Uanga nuannareqaara. Sulinermi assassornaqaaq, naak atuarnerup nalaani atuagassat amerlagaluaqisut. Eqqarsartaatsikkut pikkorittariaqarpoq assassullaqqissuusariaqarlunilu.

 

NALUNNGILIUK:

…Ukiut tamaasa kalaallit pingasut sisamalluunniit, kigutinut nakorsanngorniarlutik aallartittarput, ataaserli marlulluunniit naammassisarlutik.