Qanilaarneq, misigissutsit sakkortuut rockilu qiimmannartoq

Qanilaarneq, misigissutsit sakkortuut rockilu qiimmannartoq

Eqqarsaatit misigissutsillu nikallornartut iperarnissaat rockillu qiimmannartup tiguartiffiginissaa Akisuanerit Festivalip ulluisa aappaanni kingullermilu pineqarput.

 

Allattoq Thora Monrad Hansen

 

Qatanngutigiit nuannarineqarluartut Adam & Kimmernaq Kjeldsen immikkut ittumik pulaartutik tusarnaartitsivissuarmut qaqitimmatigit kikkut tamarmik issivimminnit nikuikkunarput, pulaartullu tassaapput erinarsortartut Nina Kreutzmann Jørgensen aamma Pilu Noahsen.

-Anaana maaniinngilaq! Kikkut tamarmik asasaat, Kimmernaq, tusarnaarianut suaarpoq, tusarnaariallu ingerlaannaq akivaat.

Erinarsuut taanna nuannarineqarluartoq Hans-Ole Amossenip nipilersornikkut suliniumminut Da Bartali Crew-imut allataraa, nivissallu taakku aamma erinarsoqataaffigisartagaraat. Nipilersoqatigiit taakkoqqissaat nunatta Nunani Avannarlerni Nipilersornikkut Nersornaasiinissamut nersornaasigassatut innersuussimavaa. Stockholmimi una qaammat naalerpat nersornaasiisoqassaaq. Akisuanerit Festivalip ulluisa aappaat kingullerlu Katuap Paarlersuani ingerlanneqartoq aallartilluangaarmat paasinarsivoq unnuk taanna nuannannersuaqartussanngortoq.

Nipilersukkat kikkut tamaasa katersorsinnaavai, ukiut tunuliaquttallu apeqqutaatinnagit. Anguniagaq ataaseq anguneqartarpoq. Misigissutsit eqqumiitsuliortunit pinnersumik oqaluttuarineqartarput tusarnaartullu pimisut isigilertarpaat. Soorlu aamma erinarsuut “Ingerlaliinnaleqaagut” filmimut ersinartulersaarummut allagaagaluartoq tusarnaartartunit taama aamma pineqartartoq.

-Uummatiga ulikkaariartormat, kissarneq tunginnut supoorpara, Nanook-ip erinarsortuata aappaa, Frederik K. Elsner, qullernit aappaluttumit qaammaqquserneqarsimalluni taama erinarsorpoq.

Tusarnaariat 1200-it erinarsoqataalerput. Nipilersoqatigiit taakku nunatsinni nipilersornerup oqaluttuarisaanerani nutaanerusumi nuannarineqarnerpaat ilagaat nunanullu allanut immikkut pisoqartillugu tusarnaartitsiartullattaasarput. Pinngortitaq, silaannaap pissusaa asanninnerlu pillugit taalliaat tussunngunalaartut erinniaallu sorpassuarnik ilaartugaanngitsut tusaqqoornartuliat nunatta avammut nittarsaanneqarneranut tulluartillugit aallartitatut atorneqakkajuttarput.

-Timmissat taartut sumut minniarpisi, qatanngutaa, Christian K. Elsner, erinarsorpoq, uisorernerinnarmilu Paarlersuarmiittut tamarmik erinarsoqataalerput, pissittaarlutik qitillutillu.

Alla aamma tusarnaarianik taama katersuutsitsisinnaasoq tassaavoq tamatta pigisarput erinarsortartoq, Julie Berthelsen. Inuusuttuaraalluni aallarteqqaarami nipilersoqatigiinni Sarsuasut-ni kalaallisuinnaq erinarsortarsimavoq, tamatuma saniatigut angummi nipilersoqatigisartagaani, SUME-kkunni aamma tulleertuusarsimavoq. Tamatuma kingornatigut Danmarkimi erinarsornermut unammisitsinermi peqataavoq normu 2-nngorlunilu, taamanikkut nakorsanngorniarnermi nalaani tamanna pivoq. Danmarkimi massakkut najugaqarpoq erinarsornerlu inuussutissarsiutigineruaa, tamatumuuna tuluttut erinarsortarluni.

-Neriunnerli pigaarput, nukittorsaatigisigu, erinarsorpoq.

Unnummut tassunga atatillugu nipilersortartut kalaallit misilittagartuut nipilersortussarsiarisimavai. Taakkununnga ilaavoq pattattartoq pikkorilluinnartoq, Glenn Møller. Taanna tusarnaartitsillualaavippoq, taalliortartorpalaartumik tusarnerluinnartumik ingiuinermigut. Aammali Julie Berthelsenip “Every little part of me” Danmarkimi taamani unammissutigisimasaa Katuami tusarnaarianit tigulluarneqarpoq. Inuit saavanut katersuupput erinarsoqataalerlutillu. Ataatsimoorneq, aatsaat tassa!

Ukioq manna Akisuanerit Festivalimut nunanit allaninngaanniit tikisitaq tassaavoq qallunaaq erinarsortartoq 31-nik ukiulik, MØ. Taanna indiepop-inik atuisarpoq. Nipilersornikkut nersornaaterpassuit pissarsiarisimavai allaallu erinarsuusiai nunarsuaq tamakkerlugu inunnit milliardit sinnerlugit amerlassusilinnit internetikkut aaneqarsimallutik.

-MØ kisiviat pillugu aggerpunga. Maannartinnissaa iluatsissimammat maanilu nunanni tusarnaariarsinnaagakku tupinnaannarporluunniit, arnaq inuusuttoq 22-nik ukiulik oqarpoq.

– Under the bad, bad moon tonight. Or baby, is it just me? Or is it something in the air we breathe? ‘Cause I’m feeling dizzy, dizzy, ah, erinarsorpoq.

Erinarsuut taanna kikkut tamarmik ilisarnartorsiffigisinnaagunarpaat. Inuunerup ilaani isumanerluuteqarluni nikallungassuteqarlunilu qanoq iliornissaq ilaatigut nalunarsisinnaasarmat kikkut tamarmik nalugunanngilaat. Tiguartinnartumik erinarsorpoq, taamaanneralu nuannarinnittaasa ingerlaannaq tiguartiffigalugu malilerpaat, nipilersornerup sinnattullu nunaannut pulatillugit.

Taamaalilutik tusarnaartitsinerit naammassimmata kikkut tamarmik nuannannertik illoqarfimmi nangeqqissinnaanngorpaat imaluunniit pissatsisimaarlutik angerlarsinnaanngorput. Tarneq pissarsingaarsimassaaq, aappaagu Akisuanerit Festivalertoqaqqinnissaata tungaanut!