SOOQ ILINNIARNEQ?

SOOQ ILINNIARNEQ?

ANU UNAp nunatsinni politikkerinut assigiinngitsunut sooq ilinniarnerup pingaarneranik apeqquteqarpoq. Allaaserisami uani isumaat atuarsinnaavatit.

 

Sara Olsvig (IA):
BA Inuiaat piorsarsimassusaat oqaluttuarisaanerallu, kiisalu antropologimi kandidat:

 

– Ilinniakkama allaffimmit inuiaqatigiinnut pisippaannga, inuit assigiinngitsut oqaloqatigalugit sulinikkut, inaarutaasumik allaaserisakka suliarisussaagakkit. Ilinniakkama piffinni assigiinngitsuni, apeqqutinillu inuiaqatigiinnut tunngasunik, itisiliisinnaanissannut misissuisinnaanilernissannullu piginnaasaqalersippaannga. Ulloq manna tikillugu politikkikkut sulininni ilinniakkakka atortarpakka. Ilinniakkakka ilikkarnikuusannik siunissamilu ilinniagassannik tunngavissaqartilerpaannga. Naak ukiorpassuit atuarnikuugaluarlunga, ullumikkut qujamasuutigaara semesterit naammassiniarlugit sukataartarnikuugama. Nuannaarutigaara atuartuunera nuannersumik atorsimagakku, inuuninni atuartutut piffissaq pingaaruteqarnikuummat.

 

 

Sara Olsvig 2008-mi kandidatitut naammasseqqammerluni, universitetimi allagartartaartoq.

 

 

Randi Vestergaard Evaldsen (Demokraatit):
Takornariartitsinermi serviceøkonomitut, kiisalu nunani tamani niuernermi tuniniaanermilu ilinniarnertuutut naammassinikoq.

 

– Ilinniarnikuuvunga kiffaanngissuseqarusullunga – nammineq inuunima ilusilersornissaanut, kiisalu allat oqaasissaqartinnagit nammineq nuannarisannik toqqaasinnaanissannut kiffaanngissuseqarusullunga. Angajoqqaatta qatanngutinnut uannullu pingaartissimaqaat ilinniagaqarnissarput, ilisimammassuk ilinniagaqarneq inuunermut pitsaanerusumut aqqutissiuisuusoq.

 

Ilinniakkama kiffaanngissutsimik tunivaannga. Qaammaasaqarnerulerninni eqqarsartariaatsimalu allanngornerani, pissutsinut paasinnissinnaanera pitsanngornikooqaaq. Ilinniarninni angalasarninnilu ineriartorninni, arnanngorpunga namminersortoq, akisussaassusilik uteriitsorlu. Ilinniakkama suliffimmut ataatsimut pituttorsimasutut misigitinngilaannga, ilinniarsimasutut periarfissat ammallutillu kiffaanngissuseqartitsimmata.

 

 

Randi Vestergaard Evaldsen.

 

 

Per Rosing Petersen (Partii Naleraq):
Inuussutissarsiutigalugu timmisartortartutut Danish College of Aviationimi 1987-imi timmisartortartunngorpoq.

 

– Århusimi nakorsanngorniarnera unitseriarlugu timmisartortartutut ilinnialerpunga taamani Namminersornerullutik Oqartussat aqqutigalugit siullerpaatut, ukiut 3½ uteriillunga itigartitaagaangama nutaanik tunngavilersuutinik nassittarlugit. Nuannersutamernga J unaavoq, Tuusi – Josef Motzfeldt Naalakkersuisuulluni Århusimi ilinniartut saqqummiiffigereerlugit taamani pisortarisaata oqarfigiartorpaanga, ataatsimiinneq naappat uninngalaaqqullunga, sunaaffa nutaarsiassaq nuannersoq sivisuumik utaqqisimasara apuunniaraat, tassalu uteriinnera iluatsissimasoq timmisartortartutullu ilinniarlunga aallartissinnaanngorluga.

 

– Ikinngutinnik aallarteqatinnillu naammassigama tunissutisiara takugakku ullortaqarpoq: 9/7-86 tassani CPL License (Commercial Pilot License) anguara. Kingusinnerusukkut ilassutitai ilanngukkakkit 1987 aasakkut naammassivakka. Danmarkimi – The Danish College of Aviation atuarpunga (sweat shirti suli pigaara). Aamma pilersitsisutut piginneqataasutut, captainitut, pisortatullu aamma 90-kunni ingerlappara Suluit Air A/S.

 

Per Rosing Petersen.

 

 

Steen Lynge (Atassut) Politi

 

– Politiittut 1988-imi ilinniarsimavunga, saniatigullu tekniker/producerisut imminut ilinniartinnikuuvunga, suli sammisartakkannik. Inuttut kiffaanngissuseqarnermik pingaartitaqaraanni ilinniagaqarneq aqqutissat pingaarnersaraat. Taamaattumik ilinniagaqaravit.

Steen Lynge.