Tussunnguneq nuannaarnerullu pianit qulliit nakkaasut

Tussunnguneq nuannaarnerullu pianit qulliit nakkaasut

Akisuanerit Festivalip ullua siulleq erinnanik alianaatsunik, erinarsortartunik nuannarineqarluartunik kiisalu nipilersukkanik tamanut tulluartunik imaqarpoq.

 

Allattoq Thora Monrad Hansen

 

Katuami tallimanngorneq oktoberip sisamaat nuannataarfissatut piareersarneqarsimavoq. Tusarnaartitsivissarsuaq qullernit tungujuaartunit qaammarneqarsimavoq, soorlulusooq Nuup qulaani qilammi ullorissat uisorilanerat. Sallaatsumik guitarerpalaap erinarsortullu nipaata tusarnersup Paarlersuaq ulikkaarpaa, erinarsortup erinarsuutinut tunniusimalluni atuisarnini tusaamaneqaatigaa.

-Aajuna tikitara, inuilaaq attorneqarsimanngivikkami, nunatsinni eqqumiitsuliortut tamatigoortut pitsaanerit ilaat, Miké Thomsen, taama erinarsorpoq.

Erinarsuusiortartoq tusaamaneqaqisoq nuannarineqaqisorlu, Karl Sivertsen, ukioq manna toqusimasoq eqqaaniarlugu erinarsuusiaa “Sinnattoraangama takusarpagit” Miké Thomsenip appimmagu tusarnaariat saavanut katersuupput. Kikkut tamarmik eqillutik erinarsoqataalerput. Nipilersukkat qanna eqqoraangagu taama pisoqartarpoq.

-Ulf Fleischer kisiviat pillugu aggerpunga, arnaq inuusuttunnguaq eqqanniittoq oqarpoq.

Taalliortoq erinniortorlu nunatta tulluusimaarutaasa ilaat, Ulf Fleischer, nipilersortartuilu piareersarluarsimaqisut Paarisa Band “Pillagaq” atorlugu tusaarnaartitsileruttorput. Taanna erinarsuut 1990-ikkunnilu saqqummersinneqarsimavoq, inuttaata oqaasertassai erinaalu eqqarsaatigilluarlugit torrallalluinnarlugu ukiorpassuarnilu nuannarineqarsinnaanngorlugu suliarisimavaa. Asasamik annaasaqarnermut tunngavoq, aliasorujussuartoqartaraluartoq neriuutissaqarnera erinarsuummi eqqartorneqarpoq. Ulf Fleischerip nipaata Paarlersuaq tamaat angusinnaagaluaraa tusarnaariat erinarsuummik pigiliussisimangaaramik tiguartillutik erinarsoqataaleraangata ilaanni tunniutiinnartarpoq. Nipilersoqatigiit aallaqqaammulli peqataasimasut, Eigil Petersen aamma Jorsi Sørensen, allaanngillat inuusuttuaranngoqqittut, tamatumuunalu appinnissaminnut pattattartoq pikkorivissoq Glenn Møller aamma tumerparpaartartoq Piitannguaq M. Lennert suleqatiserisimavaat. Kingulleq taaneqartoq tiguartivissimavoq, trommestikkini tigummiarlugit talini qummut siaarsimavai, nujai sumut tamaanga erfapput sequnngeqqallunilu erinarsoqataavoq.

-Miki? Unnugu anissuit? Miki? Kusassalaarsimassuit? Zikazap erinarsortua imaannaq uppisitassaanngitsoq nuannarineqaqisorlu, Siiva Fleischer, erinarsorpoq.

Tusarnaariat uisoriallannerinnartut sukkatigisumik qitilerput erinarsoqataalerlutillu. Erinarsuut taanna 1980-ikkunneersuugaluarpoq, kinguaariinnillu tulleriinnik katersuutsitsisinnaavoq.

-Nuussuaq saqqummereersoq inunngorpunga. Angajoqqaamma nuannarinermik appittuaannarnikuugamikku peroriartorpunga tusaarnaartuarlutigu, angut inuusuttoq saninniittoq nuannisangaarami pissittaajutigaluni taama oqarpoq.

Nipilersoqatigiit Zikaza Århusimi qangali aamma aallartissimapput, kalaallit ilinniartut inuusuttut ikinngutitillu aallartitaraat. Assigiinngitsunik aaqqissuisoqartillugu nipilersoriartarsimapput erinarsuusiamillu musikvideortaallu saqqummersissinnaasimavaat, manna tikillugu tamanit nuannarineqaqisut. Ikinngutigiit ukiut ingerlanerini naalagaaffeqatigiit immikkoortuinut assigiinngitsunut siammarsimapput, Siiva Fleischerilu Nuummut nuuppoq. Tassani nipilersortartunik allarluinnarnik katersivoq Zikaza-lu pilerseqqillugu, nipilersortartui nipilersoqatigiinni Nuutit-ninngaanneersuupput. Inuttai misilittagartuujugamik qititsitsillualaavissorput, tusarnaariallu nuannisangaaramik qilaarsuaq qangattartingajavikkunarpaat.

-Suna tamaat arajutserusunngilara, piumalleraangama kingumut aamma qiviarsinnaarusuppunga nuannisaqqissinnaarusullungalu. Nuannarisavissuaralugu ukiut 25-nngorpakka aatsaavissuarlu tusarnaartitsisoq naammattoorlugu, arnaq 40-kkunnik ukiulik mobiilini tigullugu immiussisoq oqarpoq.

Unnuk taanna naggasiisussaq, tassalu Enok Poulsen Nipilersortartunilu, tusarnaartitsivissuarmut qaqisimapput. Nipaa immikkuullarissuuvoq asanninnerlu ilungersuuterujussuanngikkaluarlugu oqaluttuarisinnaasarmagu assut nuannarineqaatigisarpaa inuppassuillu suminngaanneersuugaluarpata erinarsoqataatissinnaasarlugit. Angut angisooq eqqanni nikorfavoq erinarsoqataallunilu.

-Asasamma naveertarpaanga, qungujulaqaluni nulianilu saniminut ilillugu erinarsorlunilu qitippoq.

Aappariit inuunerat erinarsuusiami sammineqarpoq, aappaata aappani asagamiuk naveertarsinnaaneranut tunngalluni. Tusaaginnarlugu immaqa sakkortusinnaavoq, kisianni taamaanngilaq, asasarmi asagaanni aamma oqaaqqissaarneqarsinnaammat. Nipilersukkat kikkunnut tamanoortuupput, festivalillu ullua siulleq tamatumunnga aamma tunngavoq. Tamannalu puigornagu tusarnaariat qamuuna oqilillassimallutik nuannersunillu eqqaamasassinneqarsimallutik suna tamarmi naammassimmat angerlarsinnaasimassapput.