»Ukiut arfineq-pingasut iminngilanga«

»Ukiut arfineq-pingasut iminngilanga«

Aviaja Ikila Abelsen sakkortuumik peroriartornini pissutigalugu inuusuttuaranngorami imerajuttunngorpoq ukiulli arfineq-pingasut matuma siornatigut imissaarniarluni aalajangerluni.

 

All.: Pipaluk Egede Nielsen

 

42-nik ukiulik Aviaja Ikila Abelsen Tasiilameersoq ukiut arfineq-pingasut matuma siornatigut imerajuttuusimavoq. Weekendit tamaasa imertarsimavoq ilaannikkullu ulluinnarni aamma imertarluni.

 

– 14-it missaannik ukioqarlunga imigassartortalerpunga, taamanikkulli weekendit tamakkiallugit imertarlunga, imeraangamalu imminut aqussinnaajunnaartarpunga silaaruttarlungalu, Aviaja Ikila Abelsen oqaluttuarpoq.

Taamatut imertalernera meeraagallarami aqqusaarsimasaanit peqquteqarpoq, tassami misigissutsiminik matooriniarluni imertalersimagami.

 

– Peroriartorninni aqqusaakkakka imaannaanngissimaqaat, meeraallunga kinguaassiuutitigut atornerlugaanikuuvunga, imerajuttunilu peroriartorlunga, oqarpoq.

 

Aviaja Ikila Abelsen.

 

Ataataata meerariumanngikkaa

Aviajap arnaa Danmarkimi atuarluni Aviajamik naartulersimavoq, ataataasullu qallunaap meerariumasimanngilaa. Affarmillu qaammateqartoq Tasiilamukaassimavaa aanaakkuanukaallugu.

 

– Aanaakkunni peroriartorpunga, qulingiluanilli ukioqartunga aanaga kræfterluni toquvoq. Aatama kisimiilluni perorsalerpaanga, taannali sakkortoorujussuarmik pissuseqarpoq persuttaasarluni imerajuttuullunilu, oqarpoq.

Anaanaminut nooqqippoq, Nuummullu nuullutik. Ukiut tallimat missaanni Nuummi najugaqarput, 14-ninillu ukioqartoq arnaata Aviaja Tasiilamut aataanukartippaa.

 

– Anaanaga aamma sakkortulaartorujussuuvoq. Tasiilamullu utersimatsiaannartunga imminut toquppoq. Misigisaq sakkortoqaaq, taamanikkullu imertalerpunga, Aviaja oqaluttuarpoq.

 

Atornerlugaasimanini isertuukkaa

Aviajap kinguaassiutitigut atornerlugaasimanini inersimasunngornissi tikillugu isertuuppaa. Inuusuttuaraanermini imigassartortilluni marloriarluni imminut toqoriaraluarsimavoq, imigassartoraangamilu aalakoorujussuartarluni. Inersimasunngorami uinippoq sisamanillu meerartaarluni.

 

– Imertarallarama meeqqakka kingulliunneq ajorpakka, weekendinngornissaali qilanaarisarsimavara, naak meeqqakka annertunerusumik tujormisittarnikuunngikkaluarlugit aalakoorujussuarlunga silaqarnanga angerlartarnikuuvunga, oqaluttuarpoq, imerajuttuuninilu aappariinneranut ajoqutaasimasoq uiatalu imerajuttuunera qatsuttarsimagaa oqaluttuarluni.

 

 

Katsorsartinniarluni aalajangerpoq

Aviaja 2008-mi ukiukkut februaarip qaammataani imminut suliarinianngikkuni taamatut inissisimajuaannartussaanini takusinnaalerpaa iliuuseqarusulerlunilu.

 

– Aqagutaartorujussuullunga katsorsaasumik Tasiilamut tikittoqarsimasoq paasivara. Ataasinngornermilu kommunip allaffianut suliffinnullu saaffiginnippunga. Iluatsilluartumillu tassa piumassuseqarluarama ullumikkut ukiuni arfineq-pingasuni iminngilanga, Aviaja tulluusimaarpasilluni oqaluttuarpoq nangillunilu.

 

– Siumut alloriarpunga. Siorna atornerlugaanikunik katsorsaasartut qaammatit tamaasa tikittartut tikittalermata peqataaffigisalerpakka. Iluaqutaasorujussuuvoq, taamanikkut katsorsartikkama isumaqarsimagaluarpunga katsorsartinnerma nalaani annissukkakka inississimallugit, kisianni ukiuni kingullerni takusinnaavara akuerinngisakka akueriuminaatsissimasakkalu arlaqarsimasut, massakkullu imminut suliarininni peqataasarnera iluaqutaaqaaq. Ullut ilaanni naleqanngitsutut misigisimalersarama, soorlu susungaana, atorfissaqanngitsutut misigalunga. Kisianni massakkut taamatut misigisarnera qaangiukkiartorpoq, annissuisarninni akuersiartuaarama, oqarpoq.

 

Aviaja Ikila Abelsen. Asseq Namm. Pigisaq.

 

Maligassiuisoq

Aviaja Ikila Abelsen 1994-mi allaffimmiutut naammassivoq, ukiunilu 20-ni allaffimmiutut suleriarluni Pilersuisup pisiniarfiani aqutsisup tullersortaatut sulilerpoq. Ullumikkut suliffimminik paarsilluarpoq, qanittukkullu inuttut ineriartornermik pikkorissaasoqarmat saqqummeerusunnginnersoq kommunimit aperineqarsimalluni.

 

– Nammineq kajumissutsinnik saqqummiillunga inuunera oqaluttuaraara. Imaannaanngitsunik aqqusaagaqarnikuugaluarlunga massakkut imigassamik atornerluisuujunnaarlunga eqqissisimasumillu inuuneqarnera kajumissaarutitut saqqummiuppara, oqarpoq nangillunilu.

 

– Imminut akuerinissara pereersullu iperarnissaat unamminarnerpaavoq, tassami iperaasinnaannginnera pissutaalluni inuuninni tujorminartunik utersaartoqartarmat. Imerajuttuugallarama sakkortuumik pissuseqarnikuuvunga, uparuarneqarlungalu imminut illersulertarlunga. Kisianni massakkut tusarnaartalernikuuvunga, eqqissillungalu oqaloqateqarnissara suli ilikkariartorlugu.

 

Katsorsaasunngorusukkaluartoq

Katsorsartereernermi kingorna katsorsaasutut ilinnialerumalluni qinnuteqarnikuusimagaluarpoq, tuluttulli piginnaaneqarpiannginnini unittuussutigisimallugu. Taamaakkaluartoq katsorsaasunngornissi ullumikkumut suli sinnattoraa.

 

– Illoqarfitsinni katsorsaasut amigaataaqimmata katsorsaasunngorusukkaluarpunga. Kinguaassiutitigut imigassamillu atornerluinerit ajornartorsiutaasorujussuupput, aamma Tasiilami katsorsaaveqalernissaa neriuutigisaraluarpara. Nunaqqatikka maaniittut ikiorusukkaluarpakka taamatut ajornartorsiutillit, oqarpoq nangillunilu.

 

– Katsorsartissagaanni tapersersorneqarnissaq imminullu piumaffiginissaq pingaaruteqartorujussuuvoq tapersersorneqanngikkaannimi nakkariarnissaq qaninnerusarmat. Tasiilami ataavartumik katsorsaaveqartuugutta iluaqutaassagaluarpoq, maannakkummi katsorsaajartortartut katsorsaariarlutik naammassigaangamik aallaqqittaramik.

 

Aviajallu katsorsartinnini iluaqutigisimaqaa, meeqqaminummi allanullu maligassiuerusukkami.

 

– Ilaqutariinnitsinni iluaqutaaqaaq, soorunami ilaanni ulloqartarpunga misigissutsitigut utersaarlunga, taamaasigaangama imminut tusarnaalaarnissara pisariaqartittarpara, sooq taamaannerlunga apeqquserlugu. Massakkut imminut tusarnaarnissara ilikkartorujussuuara, allat piunnaarlugit imminut tusarnaarnerullunga, siornatigummi allat nuannaartinniaannarlugit inuunikuugama. Maannali eqqissiivillunga inuunera ingerlappara tamanullu maligassiuerusullunga, Aviaja naggasiilluni oqarpoq.

 

– Imminut nalligineq kinguarsaataavoq, tamatumalu qaangernissaa unamminartuulluni, Aviaja Ikila Abelsen katsorsartereernermi kingorna taamak oqarpoq.

 

Aviaja Ikila Abelsenip qitornai. Asseq Namm. Pigisaq.